३० कार्तिक २०८२, पाँचथर। मेची राजमार्ग विस्तारको क्रममा भत्काइएको पाँचथर सदरमुकाम फिदिम बजारस्थित मेनरोडमा रहेको लिम्बुवान गेट पुनर्निर्माणका लागि सहजीकरण कार्यदल गठन भएको छ।
फिदिम नगरपालिकाको समन्वयमा आइतबार नगरपालिकाको सभाहलमा बसेको सर्वपक्षिय बैठकले नगर उपप्रमुख राधाकृष्ण न्यौपानेको संयोजकत्वमा सहजीकरण कार्यदल गठन गरेको हो। सहजीकरण कार्यदलले १५ दिनभित्र गेट निर्माण गरिने स्थान, गेटको स्वरुप, आकार र रङ्ग लगायतको विषयमा यकिन गरी प्रतिवेदन बुझाउने र प्रतिवेदनमा आएको सुझाब समेतलाई आत्मसात गरी फिदिम नगरपालिका प्रवेशद्वारको रुपमा लिम्बुवान गेट निर्माण गरिने बताइएको छ।
समन्वय कार्यदल सदस्यमा फिदिम नगरपालिका वडा नं.१ का वडा अध्यक्ष गजाधर भट्टराई, वडा नं.४ का वडा अध्यक्ष उपेन्द्र लावती, वडा नं.५ का वडा अध्यक्ष भरत तुम्बापो, विगतमा बनेको लिम्बुवान गेट व्यवस्थापन समितिका संयोजक मधुराज केरुङ त्यस्तै लक्ष्मण लावती, दीलेन्द्र कुरुम्बाङ, सूर्य कुमार निरौला, मित्र लिङदेन, नरेन्द्रराज केरुङ, दीपक भण्डारी, सुनिता केरुङ र अनिला चेम्जोङ रहेका छन्।
फिदिम नगरपालिकाले चालु आर्थिक वर्षमा प्रवेशद्वार गेट निर्माणको लागि ६० लाख रुपैंयाँ बजेट विनियोजन गरेको छ। जनप्रतिनिधि र जिल्लास्थित सरोकारवालाहरुको उपस्थितिमा बसेको सर्वपक्षिय बैठक फिदिम नगरपालिकाका नगर प्रमुख मित्र प्रसाद काफ्लेको अध्यक्षतामा सम्पन्न भएको थियो।
२०८० वैशाखमा मेची राजमार्ग विस्तारको क्रममा भत्काइएको लिम्बुवान गेट पुनर्निर्माणको माग उठ्दै आएको थियो।
