२३ फागुन, २०८१ पाँचथर । फिदिम स्पोर्टिङ क्लबले ११ औँ संस्करणको फाल्गुनन्द गोल्डकप फुटबल प्रतियोगिताको आय व्यय सार्वजनिक गरेको छ ।
बिहिबार भानु मार्गस्थित क्लबको कार्यालयमा पत्रकार सम्मेलन गरी आय व्यय सार्वजनिक गरिएको हो । प्रतियोगितामा कबोल गरेको सबै रकम उठेको खण्डमा ७ लाख ५७ हजार ७ सय ७१ रुपैँया नाफा हुने अध्यक्ष दिपेन्द्र थापा मगरले जानकारी दिए । गत पुष ६ देखि १५ गतेसम्म सञ्चालन भएको प्रतियोगिताबाट जम्मा ८० लाख २९ हजार १ सय ५३ रुपैँया आम्दानी भएको थियो । जसमध्ये ७९ लाख ३ हजार १ सय २ रुपैँया खर्च भएको क्लबले जनाएको छ ।
हाल क्लबको खातामा १ लाख २६ हजार ५१ रुपैँया मौज्दात रहेको छ । प्रतियोगिताका लागि बिभिन्न संघ संस्था र दाताहरुले कबोल गरेको ८ लाख ६७ हजार १ सय नौ रुपैँया उठ्न बाँकीे छ । त्यस्तै २ लाख ३५ हजार ३ सय ८९ रुपैँया तिर्न बाँकी रहेको क्लबका महासचिव पासाङ तामाङले जानकारी दिए । प्रतियोगिताका लागि कबोल गरेको रकम संकल गर्न समय लागेकाले आय व्यय सार्वजनिक गर्न ढिलाई भएको अध्यक्ष थापामगरको भनाई छ ।
