२२ मंसिर २०८०, विराटनगर। आवर विराटनगरका समाचार संयोजक पत्रकार प्रेम देवानमाथि सुनियोजित ढंगबाट आक्रमण गर्ने तीनजना विरुद्ध किटानी जाहेरी दर्ता गरिएको छ ।
विराटनगर महानगरपालिका परिसरमा आन्दोलनरत पक्षमा सामेल भएका रमेश मण्डल, अभिमन्यु यादव र मो.रायन विरुद्ध जिल्ला प्रहरी कार्यलयमा जाहेरी दिईएको हो ।
विराटनगर–७ सातघुम्तीस्थित कवाडी गोदाममा गत बुधबार भएको आगलागी नियन्त्रणमा स्थानीय सरकार उदासिन भएको भन्दै बिहिबार एउटा समुहले विरोध कार्यक्रम राखेको थियो । उक्त विरोध कार्यक्रमको समाचार संकलनका लागि बोलाएर महानगर परिसरमा देवानमाथि आक्रमण भएको थियो ।
आक्रमण सुनियोजित ढंगबाट गराइएको देखिएपछि फोन गरेर बोलाउने मो.रायन, कार्यस्थलमा धम्की दिदै भिडियो नखिच्न भन्ने अभिमन्यु यादव र देवानलाई नियन्त्रणमा लिएर घिसार्दै भीडतर्फ लैजाने रमेश मण्डल विरुद्ध जाहेरी दिईएको पीडित देवानले जानकारी दिए ।
आक्रमणपछि नेपाल पत्रकार महासंघ, संघ तथा संगठनले घटनाको भत्सर्ना गरेका छन् । घटना भएकै दिन बुधबार रातीदेखि रिपोर्टिङका लागि भन्दै देवानलाई मो.रायनले बोलाएका थिए ।बिहिबार समेत उनले बोलाएर देवान महानगर पुगेका थिए ।
(आवर विराटनगरबाट)
