भिम चेम्जोङ पाँचथर, ३० असार । आधुनिक सहरको रुपमा विकास भइरहेको पाँचथर सदरमुकाम फिदिम बजारको मेनरोडमा स्मार्ट स्ट्रिट लाइट जडान गरिएको छ ।
नेपाल विद्युत प्राधिकरणसँगको सहकार्यमा फिदिम नगरपालिकाले जडान गरेको स्मार्ट स्ट्रिट लाइटको हालै प्रतिनिधिसभा सदस्य तथा पूर्व भौतिक पूर्वाधार तथा यातायातमन्त्री वशन्त कुमार नेम्बाङले उद्घाटन गरे । सडक बत्तीको उद्घाटन गर्दै नेम्बाङले सडक बत्ति सञ्चालनमा आएसँगै रात्रीकालीन समयमा सडक दुर्घटनासँगै आपराधिक क्रियाकलापमा कमि आउने विश्वास व्यक्त गरे ।
फिदिम बजार क्षेत्र (समर्पित अस्पताल–चारखम्बे) सम्म सडक बत्ती जडान गरिएको हो । जम्मा १७६ सडक बक्ति जोडिएको फिदिम नगरपालिकाका मेयर मित्र प्रसाद काफ्लेले बताए । त्यति सडक बत्ती जोड्न एक करोड २१ लाख तीन हजार ४०३ रुपैंयाँ खर्च भएको नगरपालिकाका उपमेयर राधाकृष्ण न्यौपानेले बताए । नेपाल विद्युत प्राधिकरणसँगको सहकार्यमा जोडिएको सडक बत्तीका लागि नगरपालिकाको मात्र ७३ लाख २० हजार १७४ रुपैंयाँ खर्च भएको प्रमुख प्रशासकीय अधिकृत प्रवीणहाङ योङहाङले बताए ।
स्मार्ट स्ट्रिट लाइट जोडिएसँगै रातीको समयमा फिदिम बजार चमकदार र रोमाञ्चक देखिएको बजारबासीले बताएका छन् । सडक बत्तिले फिदिम बजारको रात्रीकालीन रुप नै परिवर्तन भएको फिदिमबासीले बताएका छन् ।