१९ कार्तिक २०८१, पाँचथर। सदरमुकाम फिदिमस्थित पल्लोटारमा जुवा खेलिरहेको अवस्थामा प्रहरीले तीन जनलाई पक्राउ गरेको छ।
आइतबार राती साँढे दश बजे फिदिम–२ पल्लोटारस्थित एक घरमा जुवा खेलिरहेको अवस्थामा उनीहरु पक्राउ परेका हुन्। पक्राउ पर्नेमा फिदिम–२ पल्लोटारका ५६ बर्षीय खेमनाथ अधिकारी, ३१ बर्षीय मदन अधिकारी र फिदिम–१ का ४० बर्षीय हिमाल नेम्बाङ रहेका जिल्ला प्रहरी कार्यालय पाँचथरका सूचना अधिकारी बिनालाल शाह तेलीले बताए।
प्रहरीले जुवा खालबाट १६ थान कौडा सहित ६० हजार ५३० रुपैंयाँ नगद समेत बरामद गरेको छ। पक्राउ परेकाहरुलाई जिल्ला प्रहरी कार्यालय पाँचथरको हिरासतमा राखेर घटना सम्बन्धमा अनुसन्धान भइरहेको प्रहरीले जनाएको छ।
