२७ फागुन २०८१, पाँचथर। फिदिम–६ सिवामा फागुन २ गतेदेखि ७ गतेसम्म आयोजना गरिएको सिवा कला, साहित्यिक, साँस्कृतिक महोत्सव तथा अर्थवाज आमन्त्रित अन्तरपालिका भलिवल प्रतियोगितामा १ लाख ६७ हजार ५८१ रुपैंयाँ फाइदा भएको छ।
सिवा कला, साहित्य, साँस्कृतिक तथा खेलकुद आयोजक समितिले मंगलबार फिदिम–६ सिवास्थित वडा कार्यालयमा आयोजना गरेको आय–व्यय सार्वजनिक कार्यक्रममा त्यति रकम बचत फाइदा भएको बताइएको छ। आयोजक समितिका अध्यक्ष तथा फिदिम–६ का वडा अध्यक्ष विपन तुम्रोकले १६ लाख ७४ हजार ६७० रुपैंयाँ आर्थिक संकलन भएकोमा १५ लाख ७ हजार ८९ रुपैंयाँ खर्च भएको जानकारी दिए।
महोत्सव तथा प्रतियोगितामा भएको सबै खर्च कटाएर आयोजकलाई १ लाख ६७ हजार ५८१ रुपैंयाँ फाइदा भएको वडा अध्यक्ष तुम्रोकको भनाई छ। उक्त रकम महोत्सव तथा पालिकास्तरीय आमन्त्रित भलिवल प्रतियोगितालाई निरन्तरता दिन वचत गरिने बताइएको छ। महोत्सव तथा प्रतियोगिता सम्पन्न गर्न वडा कार्यालय सहित अन्य विभिन्न निकाय, संघ–संस्था र विभिन्न व्यक्तित्वहरुले सहयोग गरेका थिए।
महोत्सवमा केलाःङ् (च्याब्रुङ नाच), साकेला नाच र हुर्रा नाच प्रतियोगिता, बहूभाषिक कविता गोष्ठि, विविध साँस्कृतिक कार्यक्रम भएका थिए। त्यस्तै अर्थवाज आमन्त्रित अन्तरपालिका भलिवल प्रतियोगितामा पाँचथरको तीन र बाहिर जिल्लाका पाँच पालिका गरी जम्मा आठ पालिकाहरुको सहभागिता रहेको थियो।
