२४ फागुन २०८१, धनकुटा। ११५ औं अन्तरराष्ट्रिय महिला दिवसको अवसरमा यहाँस्थित साँगुरीगढी गाउँपालिकाको आयोजनामा पालिकाका महिलाका लागि कविता प्रतियोगिता सम्पन्न भएको छ।
साँगुरीगढी गाउँपालिकाको कार्यालय भेंडेटारमा शनिबार सम्पन्न कविता प्रतियोगितामा पालिकाका १७ जना महिलाहरुले सहभागिता जनाएका थिए। प्रतियोगितामा पवित्रा कुमारी सावादेन, एञ्जल लिम्बू, मौसमी राई त्यस्तै कुमारी राई र बिनिता राई क्रमशः प्रथम, द्वितीय, त्रितीय र सान्तवना भएका निर्णायक मण्डलका संयोजक कवि केजी सुब्बाले बताए।
प्रतियोगितामा प्रथम, द्वितीय, त्रितीय र सान्तवना हुने कविहरुलाई प्रमाणपत्र सहित कर कटाएर क्रमशः नगद ८ हजार रुपैंयाँ, ६ हजार रुपैंयाँ, ४ हजार रुपैंयाँ र ३ हजार रुपैंयाँ (सान्तवना हुने दुई जनालाई १५–१५ सय रुपैंयाँ) पुरस्कार प्रदान गरिएको साँगुरीगढी गाउँपालिकाको कार्यालय, महिला तथा बालबालिका शाखा प्रमुख सिर्जना हिङमाङले जानकारी दिइन्।
विजयी कविहरुलाई कार्यक्रमका प्रमुख अतिथि, साँगुरीगढी गाउँपालिकाका अध्यक्ष जीतेन्द्र रुम्दाली राई, उपाध्यक्ष मुना राई, प्रमुख प्रशासकीय अधिकृत राज कुमार शाक्य लगायतले पुरस्कार वितरण गरेका थिए। कार्यक्रममा सहिदभूमी गाउँपालिकाका अध्यक्ष मनोज राईको समेत उपस्थिति रहेको थियो। सोही अवसरमा आयोजित हण्डिफोर प्रतियोगितामा मौसमी राई प्रथम भइन्। उनले प्रमाणपत्र र नगद ४ हजार रुपैंयाँ पुरस्कार प्राप्त गरिन्।
कार्यक्रममा प्रमुख अतिथि, साँगुरीगढी गाउँपालिका अध्यक्ष राईले भौतिक पूर्वाधार विकास, नागरिकको जनजीविका र सेवा प्रवाहलाई सहज बनाउनेसँगै मानवीय क्षमता विकासका कार्यक्रमलाई पनि गाउँपालिकाले प्राथमिकतामा राखेको बताए। कला, साहित्यले चेतनाको विकास गर्ने भएकाले अन्तरराष्ट्रिय महिला दिवशको अवसरमा कविता प्रतियोगिता आयोजना गरिएको अध्यक्ष राईले बताए।
कार्यक्रम साँगुरीगढी गाउँपालिकाका उपाध्यक्ष मुना राईको अध्यक्षतमा सम्पन्न भएको महिला तथा बालबालिका शाखा प्रमुख हिङमाङले जानकारी दिइन्।