१४ असार २०८२, विजयपुर। लिम्बुवान नागरिक समाज (लिनास) युकेले वितरण गर्ने ‘काङ्सोरे पुरस्कार’ यसपटक इतिहासकार स्व. इमानसिङ चेम्जोङलाई प्रदान गरिने भएको छ । उनी मरणोपरान्त यो पुरस्कार प्राप्त गर्ने पहिलो व्यक्ति हुन् ।
लिनास युकेले शुक्रबार एक विज्ञप्ति जारी गर्दै स्व. चेम्जोङलाई इतिहास, भाषा, लिपि, अनुसन्धान, प्राज्ञिक अन्वेषण र लिम्बुवानको राजनीति उठान गर्न पुर्याएको अतुलनीय योगदानलाई उच्च कदर र मूल्यांकन गर्दै काङ्सोरे पुरस्कारले सुशोभित गर्न लागिएको उल्लेख गरेको छ । पुरस्कारको राशी नगद एक लाख रुपैयाँ र ताम्रपत्र रहेको छ ।
विज्ञप्तिमा भनिएको छ, ‘प्रत्येक तीन तीन वर्षमा वितरण गरिने यस वर्षको काङ्सोरे पुरस्कार (सन् २०२५÷वि.सं. २०८२) इतिहासकार, साहित्यकार, खोज अनुसन्धाता, लिपिकार, भाषाविद, दर्शनविद स्व. इमानसिंह चेम्जोङ (सन् १९०४–१९७५) लाई मरणोपरान्त प्रदान गर्ने निर्णय गरेका छौँ । उहाँले इतिहास, भाषा, लिपि, अनुसन्धान, प्राज्ञिक अन्वेषण र लिम्बुवानको राजनीति उठान गर्न पुर्याएको अतुलनीय योगदानलाई आधार मान्दै पुरस्कार छनोट समितिले स्व. चेम्जोङलाई काङ्सोरे पुरस्कार का लागि योग्य ठहर गरेको हो ।’ विज्ञप्तिमा अध्यक्ष छत्र वनेम र सहसचिव अमित थेबेको हस्ताक्षर रहेको छ ।
उक्त पुरस्कार धरानमा यहीँ आउँदो जुलाई ५ तारिख तद्नुसार असार २१ गते शनिबारका दिन स्व. चेम्जोङलाई प्रदान गरिने समाजका अध्यक्ष वनेमले बताए । उनले प्रदेश एकका पूर्व प्रदेश प्रमुख प्रा.डा. गोविन्द बहादुर तुम्बाहाङको प्रमुख आतिथ्यमा पुरस्कार वितरण गरिने जनाएको छ । सो कार्यक्रमको व्यवस्थापन किरात याक्थुङ चुम्लुङ सुनसरी र धरान उपमहानगर समितिले गर्ने उनले बताए ।
समाजले सन् २०२२ (वि.सं.२०७९) मा पहिलो पटक याक्थुङ भाषा, सिरिजङ्गा लिपिको प्रचार र चार दशकदेखि लिम्बुवानको मुद्दा उठाउन सक्रिय भूमिका खेलेबापत् पान्थर याम्बोङका नेता वीर नेम्वाङलाई प्रदान गरिएको थियो ।
लिम्बुवान स्वायत्तताको पक्षमा सामाजिक ढङ्गले साढे एक दशकदेखि क्रियाशील रहेको लिम्बुवान नागरिक समाज यूके सन् २००९ मा बेलायतमा स्थापना भएको हो । लिम्बुवान प्राप्तिका लागि उल्लेख्य योगदान पु¥याउँदै आएका एक व्यक्तित्वलाई काङ्सोरे पुरस्कार प्रदान गरिँदै आएको छ ।
लिम्बुवानका सेनापति एवम् योद्धा काङ्सोरे लिम्बुको स्मृति र सम्मानमा काङ्सोरे पुरस्कार को स्थापना गरिएको हो । काङ्सोरेले सन् १७७४ मा सभाया खोलाको किनारमा तत्कालीन गोरखाली सेनासँगको युद्धका क्रममा सहादत प्राप्त गरेका थिए ।
