२० मंसिर २०८०, पाँचथर। आयोजक पाँचथर फुटवल क्लवलाई ट्राइब्रेकरमा निरास पार्दै मोरङको डाँगीहाट फुटवल क्लव (डिएफसी) पाँचथर सदरमुकाम फिदिममा जारी प्रथम वाइ वाइ अन्तराष्ट्रिय आमन्त्रण किरात गोल्डकपको उपाधी नजिक पुगेको छ ।
सदरमुकामस्थित फिदिम खेलमैदानमा बिहीबार भएको प्रतियोगिताको पहिलो सेमीफाइनल खेलमा आयोजक पाँचथर फुटवल क्लव ट्राईब्रेरमा चुकेको हो । प्रतिश्पर्धात्मक खेलको निर्धारित समय गोल रहित बराबरीमा सकिएपछि भएको ट्राईब्रेकरमा डाँगीहाट मोरङले ४–१ गोलले बाजी मार्यो ।
ट्राईब्रेकरमा डाँगीहाट फुटवल क्लव मोरङको तर्फबाट उमेश राई, सञ्जय धिमाल, उमेश कार्की र अभिषेक लिम्बूको प्रहारले जाली चुम्यो । आयोजक पाँचथर फुटवल क्लवको तर्फबाट पहिलो प्रहार गरेका कप्तान रोशन आङदेम्बेको प्रहार आकासियो । दोस्रो प्रहारका लागि गएका असिम राईले गोल गरे । तर, तेस्रो प्रहारका लागि गएका प्रकाश धमलाको प्रहारलाई मोरङका गोलकिपर प्रमिजय गच्छेदारले बचाए ।
मोरङका गोलकिपर प्रमिजय खेलको म्यान अफ् दि च्याच बने । उनले नगद पाँच हजार रुपैंयाँ प्राप्त गरे । कडा प्रतिश्पर्धात्मक भएको खेलमा दुबै टोलीले सुन्दर अवशरहरु सिर्जना गरे पनि गोल गर्न नसक्दा खेल ट्राईब्रेकरमा धकेलिएको थियो । जारी प्रतियोगिताको यो पहिलो ट्राईब्रकर हो ।
प्रतियोगिता अन्तर्गत दोस्रो तथा अन्तिम सेमीफाइनल खेल बिहीबार दिउँसो २ः३० बजेदेखि झापाको बिर्तामोड युनाइटेड क्लव र ताप्लेजुङको कर्णसिं सोनाम स्मृति क्लवबीच हुने आयोजक पाँचथर फुटवल क्लवले जनाएको छ ।
