सन्देश सुब्बा
२९ फागुन २०८१, पाँथचर। ‘ए’ डिविजन लिग विजेता चर्च व्वाइज युनाइटेड क्वल काठमाडौंलाई रोक्दै मधेश प्रदेशको नमो बुद्ध एफसी सप्तरी पाँचथरको फिदिममा जारी पाँचौं संस्करणको वाइवाइ अन्तरराष्ट्रिय आमन्त्रण पाँचथर गोल्डकप फुटवल प्रतियोगिताको फाइनल प्रवेश गरेको छ।
फिदिम माविको खेलमैदानमा आज (बिहीबार) सम्पन्न प्रतियोगिताको दोस्रो तथा अन्तिम सेमीफाइनल खेलमा चर्च व्वाइजलाई टाइब्रेकरमा ४–२ गोलले स्तब्ध पार्दै नमो बुद्ध एफसीले उपाधि भिंडन्तका लागि मच्छिन्द्र फुटवल क्लव काठमाडौंसँगको भेट पक्का गरेको हो। खेलको निर्धारित समय २–२ गोलको बराबरीमा सकिएपछि खेलको निर्णय सोझै टाइब्रेकरबाट लिइएको थियो।
खेलको ३३ औं मिनेटमा जेम्स प्रजापतिको गोलबाट नमो बुद्धले सुरुवाति अग्रता बनाएको थियो। आफ्नो डिफेन्स लाइनबाट प्राप्त लामो पासलाई नियन्त्रणमा राख्दै जेम्सले सुन्दर गोल गर्दा नमो बुद्धले १–० को सुरुवाति अग्रता बनाएको थियो। तर, पहिलो हाफको इन्जुरी समयमा चर्च व्वाइजका लागि ध्रुव राईले गोल फर्काउदै नतिजा १–१ को बराबरीमा ल्याएका थिए।
दोस्रो हाफमा पुनः नमो बुद्ध अग्रता बनाउन सफल रह्यो। ६१ औं मिनेटमा जेम्सले नै व्यक्तिगत दोस्रो गोल गर्दै टिमलाई २–१ को अग्रता दिलाए। दबाबमा परेको चर्च व्वाइजका लागि ८५ औं मिनेटमा राज भुषालले विपक्षि गोलकिपर जयनाथ शेखबाट रिबाउण्ड भएको बललाई चलाखीपूर्ण हेडर मार्फत जाली चुमाएर टोलीलाई खेलमा फर्काएका थिए। त्यसपछि दुबै तर्फबाट कुनै गोल नहुँदा खेलको निर्णय टाइब्रेकरबाट लिइएको थियो।
पेनाल्टि सुटआउटमा नमो बुद्धका विवेक गुरुङ, आयुश मगर, अनिल मगर र विवेक राईले गोल गरे। चर्च व्वाइजका लागि विदेशी खेलाडी तल्ला र फोफोना मात्र गोल गर्न सफल रहे। अभिषेक महतो र सागर तिरुवाको प्रहारमा नमो बुद्धका गोलकिपर जयनाथ शेख बाधक बन्दा प्रतियोगितामा चर्च व्वाइजको यात्रा अन्तिम सेमीफाइनलबाट टुंगियो।
खेलको म्यान अफ् दि म्याच विपक्षिको दुई वटा पेनाल्टि रोकेका नमो बुद्ध एफसीका जयनाथ शेख घोषित भए। उनलाई कार्यक्रमका प्रमुख अतिथि, नेपाली कांग्रेस पाँचथरका सभापति रुपनारायण जबेगु र आयोजक पाँचथर क्लवका अध्यक्ष कमल तुम्रोकले ट्रफि र नगद ७ हजार ५ सय रुपैंयाँ हस्तान्तरण गरे। त्यस्तै आजको फ्यान अफ् दि म्याज फिदिम–१ का प्रिसेन श्रेष्ठ घोषित भए।
चार ‘ए’ डिविजन क्लव र एक छिमेकी मुलुक भारतको टोली सहित आठ टिमको सहभागिता रहेको प्रतियोगिताको फाइनल खेल चैत २ गते आजको विजेता नमो बुद्ध एफसी सप्तरी र मच्छिन्द्र फुटवल क्लव काठमाडौं बिच हुनेछ। प्रतियोगिताको विजेताले नगद ११ लाख १ हजार १११ रुपैंयाँ र उपविजेताले नगद ५ लाख ५५ हजार ५५५ रुपैंयाँ प्राप्त गर्नेछ।
